Hilabete batzuk pasa dira Jez-en enpresa paktuaren negoziaketak hasi zirenetik eta, komitearen esanetan, zuzendaritzak lan erreformaren aplikazioarekin aurrera jarraitzeko intentzioa erakutsi du. Honi, martxoan hasi eta urte bateko luzera izango duen Enplegu Erregulazio Espedientea gehitu behar zaio.
Egoera honen aurrean, enpresa komiteak proposamen bat luzatu dio zuzendaritzari. Bertan, enpresa paktuan onartutako kondizioak ez txikitzeko konpromisoa eskatzen diote Jez-i , paktuaren ultra aktibitatea onartzearekin batera. Gainera, lanpostua mantenduko dutenaren bermea exijitzen diote, eta, hauek denak onartutakoan, alde bateko zein besteko proposamenak alboratzea, kondiziorik eta mehatxurik gabeko negoziaketa berri bat hasteko.
Enpresak planteamendu honi ezezkoa eman diola salatu du komiteak. Ondorioz, negoziaketak hautsi eta xantai eta soldata murrizketa, kanporatze… mehatxu gisa definitutakoei aurre egiteko salaketa kanpaina hasiko dutela iragarri dute, etendako kontaktuak berriz martxan jartzeko.