Otsailaren 5ean Langraizen hasi zen Arabako Bertsolari Txapelketa. Atzo (otsailak 12) arratsaldean Zigoitian jokatu zen txapelketaren 2.finalaurrekoa. Eszenatokian, Arabako bertso eskolen sarea irudikatu nahi duen amaraunaren pankartaren aurrean sei bertsolari, hurrengoak:
Andere Arriolabengoa Bengoa (Aramaio)
Iker Agirre Uribarren (Aramaio)
Iñaki Viñaspre Simon (Abetxuko)
Jagoba Apaolaza Castro (Gasteiz)
Serapio Lopez Ortueta (Baranbio)
Xabi Igoa Eriz (Aramaio)
Lehenengo itzuli honetan 13 bertso puntuagarri kantatu behar dute bertsolariek. Eta Zigoitian, ariketa guztiak egin ondoren, Xabi Igoak lortu zuen puntu gehien, 239 puntu. Puntuazioak ondorengoak izan ziren:
Xabi Igoa, 239 puntu
Iñaki Viñaspre, 230,5 puntu
Serapio Lopez, 227,5 puntu
Andere Arriolabengoa, 220,5 puntu
Iker Agirre, 215,5 puntu
Jagoba Apaolaza, 189 puntu
Xabi Igoak Laudion kantatuko du, 2.itzuliko 5. finalaurrekoan, martxoaren 12an. Gainontzeko bertsolariak gehi Langraizen kantatu zuten beste bost puntuazioen zain geratu dira jakiteko non kantatuko duten bigarren itzulian.
Zazpi lagunez osatutako gai-jartzaile taldetik Aintzane Irazusta izan zen Zigoitian aurkezlea. Lehenengo itzuliaren 3 finalaurrekoetako epaimahaia, horrela osatuta dago: Patxi Aizpurua, Iker Elexpuru eta Ainhoa Aizpurua. Idazkari lanetan Esti Zengoitibengoa.
Izar Mendiguren, datorren igandean
Datorren igandean, Dulantzin, 1. itzuliko azkeneko finalaurrekoa jokatuko da. Izar Mendiguren laudioarra arituko da bertan, besteak beste. Bertan sortuko den sailkapenarekin hurrengo 3 finalaurrekoak osatuko dira.