Aratuste eguzariaren aitzakian, 1688an Urduñan gertaturiko soka-dantza baten berri dakarkigu, dantza berezia apaiz kabildoa izan zuelako protagonista. Kabildoaren eta Udalaren arteko tira-bira bat genuke leherrarazle, abadeek manifestazio bitxi hau antolatu ei zuten eta.
Izan ere, abuztuaren 17an, apaizek txistulari bat ekarri zuten goizean antolaturiko elizbira batean jo zezan. Arrastian baina, beste asmo bat zuten: zazpi abadek (aurresku- eta atzeskularia barne), euren eliza-janzkera disimulatuz, soka-dantza bat hasi zuten. Abade mozorrotuak parrokiatik irten ziren eskutik oraturik eta, danbolin soinuaz, plaza nagusia igaro eta hiriko kaleetan zehar ibili ziren soka-dantzan eguna argitu bitartean. Gautu zenean dantzari utzi ordez, argi-zuzi bat irazeki eta hiri-bazterretan jarraitu zuten dantzariek. Herriko biztanleek, mutil eta nagusi, soka-dantza bitxi hau kalerik kale lagundu zuten eta, nola ez, egungo manifestaziotan legez “Gora kabildoa!” eta antzeko oihuak entzuten ziren soka-dantzan zehar. Dirudienez, guztien artean aurreskularia zen oihu, salto eta artazirik gehien egin zuena.
Udalak probokaziotzat jo zuen abadeen dantza hau, eta apezpikuari berri ematea erabaki, honek apaizak zigor zitzan. Alabaina, ez dakigu apezpikuaren agindua edo dantzariek inolako zigorrik izan ote zuten.