Gaur goizean Laudioko Udalak adierazpen instituzional bat onartu du herriko Anbulatorioko Etengabeko Arretako Gunean (EAG) bizilagun bat hil izana deitoratzeko, zerbitzuan medikurik ez zegoela egiaztatu baitzen. "Tamalez, gure herriak ez du larrialdietako medikurik normalean. Orain, urteetan salatu dugun errealitate bati aurre egin behar diogu. Osakidetzak ezinbestekotzat hartzen dugun zerbitzu hau kentzearen erabakiaren aurrean, kritikak jaso izan ditu geure aldetik”, deitoratu dute Udalean.
Gertatutakoaren aurrean, Udalak hildakoaren familiari eta gertukoei babesa eta elkartasuna adierazi nahi die, eta beharrezkotzat jotzen dituzten esparru guztietan laguntzeko prestutasuna adierazi ere. Era berean, dei egiten die herritarrei deitutako mobilizazioekin bat egin dezaten herri-ekimenak aktibatuz. "Eskualde osoa gonbidatzen dugu antolatu diren elkarretaratze eta manifestazioetan elkarkidetasunez parte hartzera, gure haserrea adierazteko eta aldaketa bat eskatzeko", gaineratu dute.
Udalak larrialdietako medikuen presentzia ezaren aurrean bere gaitzespena berresten du, eta Osakidetzari eta Eusko Jaurlaritzari funtsezko zerbitzua den hau berehala berrezartzea eta indartzea eskatu dio. "Ezin dira onartu gure herritarren osasuna eta bizitza arriskuan jartzen dituzten erabakiak, tokian tokiko benetako ondorioak kontuan hartzen ez dituztenak gainera. Urrututik hartzen diren erabakiek ondorio hilgarriak izan ditzakete, berriki sentitu dugun bezala", gaineratu dute.
Hori guztiagatik, Udalak Laudioko anbulatorioko Etengabeko Arretako Gunean (EAG) arreta bermatuko duten eskura dituen mekanismo guztiak abian jartzeko konpromisoa hartu du. "Tragedia honek bat egitera bultzatu gaitzala, geure eskubideak eta ongizatea defendatzen dituen komunitate bat izatera. Udaletik, Laudioko eta eskualdeko herritar guztien segurtasuna eta osasuna zaintzeko konpromisoa berresten dugu", amaitu dute.