Azaroaren 27ko Osoko Bilkuran bi plan estrategiko onartu zituen Udalak. Bata, Euskara Sustatzeko Ekintza Plana (ESEP) izan zen eta orain arte indarrean egon den Euskara Biziberritzeko Plan Nagusia (EBPN) ordezkatuko du. Bestea, berriz, datozen 10 urteetarako Amurrioko III Tokiko Ekintza Plana ( TEP) da eta Garapen Jasangarria eta Tokiko 21 Agendarekin loturik jarraituko du.
ESEParen 2014-2017 Plan Estrategikoak, gizarte esparru ezberdinetako normalizazio ekintzak jasotzen dituen marko osatu bat eskainzten duela azpimarratu du Udalak. Hala, familia bidezko transmisioan, irakaskuntzan, euskalduntzean eta alfabetatzean, administrazioan, arlo sozioekonomikoan, aisian eta kirolan, liburugintzan, kulturgintzan, publizitatean, Corpus plangintzan eta euskararen kalitatean, hedabideetan, informazioan eta komunikazioaren teknologietan, sentsibilizazioan eta motibazioan, barruko proiekzioan, kanpoko proiekzioan eta bestelakoetan kontutan hartuko da.
Euskaren inguruko plan estrategikoa Euskara eta Funtzio Publikoaren Batzordeak egin du eta euskalgintzan, ikastetxe zein Udalean ordezkaritza duten alderdi politikoetako ordezkarien parte-hartzearekin lortu da.
Amurrioko III Tokiko Ekintza Plana
TEP-ari dagokionez, 8 lerro estrategiko izango ditu eta guztira 115 jarduera bilduko ditu, Udalaren etorkizuneko ekintza eta erabakientzat ardatz izango delarik. “Plan honen misioa baliabideetan autonomia zabala duen Amurrio lortzea da, ondo egituratutako lurralde batek ondare natural eta kulturalaren kontserbazioa ahalbidetuz eta ingurumen kalitate handia bermatuz”, adierazi zuen Josune Irabien alkateak.
Bestalde, herriko bizikidetza eremuak atseginak izatea eta biztanleek bizi-kalitatea handia erdiestea ere du helburu. “Herritarrek komunikazio eta parte-hartze erreal eta eraginkorrerako bideak erabiltzea eta ingurumena, hurbiltasuna, berrikuntza eta aukeren berdintasunari dagokienez, udalerriak bere biztanleen ongizatea bermatuko duen ekonomia izatea ere lortu nahi da”, gaineratu zuen Irabienek.