Espainiako Gobernuak EAEn duen ordezkariak Gipuzkoako hamahiru udal salatu omen ditu udaleko aktak euskaraz egiteagatik. Dirudienez, legearen arabera, udal guztiek Estatuko eta Erkidegoko administrazioei helarazi behar izaten dizkiete aktak. Baina oraingo honetan, Gobernuaren ordezkariak ez ditu euskaraz soilik idatzitako aktak onartu, eta jaso izan ez balitu bezala jokatu du, alboan gaztelaniazko bertsiorik ez dutelako.Jakina, hau ez da udal batzuen aurkako auzibide arrunta soilik. Ekinbide horren bitartez, euskara hutsean idatzitako aktak ez-legezkotzat hartu eta euskarari komunikaziorako “gaitasun juridikoa” ukatu nahi zaio.
Zaila da imajinatzea, hamaika herri horietako udal ordezkariek azken urteotan esandako, adostutako eta erabakitako guztiak bat-batean ezerez bihurtzea, baina praktikan hala da. Ke bihurtuko ote dira orain udal akordio horien ondorioz sortutako zerbitzu, ekintza sozial eta herri-lanak? Larri ibili!
Antza, gure amesgaiztoak ez du amaierarik izango. Hainbeste urte, ahalegin, borroka eta aldarrikapenen ondoren, oraindik gure hitza gaztelaniaren makulurik gabe hutsaren hurrengoa dela entzun behar.
“Kontua zera da --esan zuen Humpty Dumptyk- Agintzen duena nor den, horixe da dena”.
Nire ustez, gurpil zoro honetatik atera gaitzakeen bakarra erabakitzeko eskubidea gauzatzea da.