Mahaiaren bueltan elkartzeko sasoia ohi dira Gabonak. Datozen hiru asteetan bazkari zein afari ugarirekin egingo dute topo aiaraldear gehienek; lagun, lankide zein familiako hitzorduekin, hain zuzen. Festarekin lotutako garaia da Eguberria. Egun garrantzitsuenak markatuak ditu: abenduak 24, 25, 31 eta urtarrilak 1. Horri, urtarrilaren 5 eta 6ko ospakizuna gehitu beharko litzaioke, erroskoia jateko ohituraz gain. Baina ba al da janari eta edari gaindosiei aurre egiteko gomendiorik?
Maite Garcia urduñarrak medikuntza naturala du ogibide. Haren esanetan aintzat hartu beharreko lehen gomendioa sabela hutsik dagoela ez edatea da, “elikagaiek alkoholaren xurgatze prozesua atzeratzen baitute”. Horrez gain, karbohidratoak (ogia, zerealak...) hartzea ona dela dio, glukosa igotzeaz gain biharamuneko ajea murrizten baitute, glukosa areagotuz. Biharamuna deshidratazioaren ondorio da. Horregatik, oheratu aurretik ura edatea zein menu “astunen” ondoren infusioak hartzea aholkatzen dute. Bestalde, gibela zaintze aldera, salda hartzea da beste soluzioetako bat. “Alkatxofak, apioa... badira gorputzeko organoak garbitzen laguntzen duten hainbat osagai”.
Ariketa fisikoa
Edozelan ere, ariketa fisikoa egitea da tripekadei aurre egiteko modurik onena. Eskualdean hainbat hitzordu berezi daude horretarako: urtea agurtzeko mendi txangoak, Orozkoko San Silvestre duatloia...