Basalarrina Kultura Elkarteak Laudioko Udalak eskuratu berri dituen euskal mitologian oinarritutako buruhandi eta erraldoien erabilpena bideratu eta dinamizatuko duen taldea jarriko du abian.
Taldea eratzeko lehen hitzordua maiatzaren 6rako, ostirala, iragarri dute arratsaldeko 6etan Laudioko plazan. Tailerrean pertsonaia berrien jantziak probatu eta bestelako kontu praktikoak lantzeaz gain, aurrera begira taldeak izango dituen egitasmoak mamitzen hasiko dira.
Izan ere, hurrengo egunean, larunbatean, buruhandi eta erraldoi berrien lehen agerraldia gauzatuko dute taldekideek Laudion bizi gara taldeak antolatu duen kulturarteko jardunaldian.
Euskal kultura
Basalarrina Elkartearen ekimenez, herriko hainbat elkarte eta ikastetxek abiatu zuten ekimena Udalak buruhandi eta erraldoi berriak erosteko. Azken Dolumin Barikuan aurkeztu ziren Mari eta Tartalo errraldoiak eta Nikolas, Sorgina, Akerbeltz eta Basajaun buruhandiak bestetik.
Basalarrina Elkarteak azaldu duenez, ekimenak helburu ezberdinak zituen. “Betiko buruhandi eta erraldoiak gaitzetsi gabe, faltan ziren euskal kulturari lotutako erreferentziak eta ondorioz, asmo berrietarako euskal mitologiaren pertsonaietan eredu hartzea proposatu zen” azaldu dute.
Jokamolde berriak
Honez gain, konpartsaren funtzionamendu bera eraberritzeko hausnarketa ere egin dute: “beldurrari, jotzeari eta gizontasunari lotutako egungo buruhandien jokamoldeak zalantzak sortzen zituen, bestelako eredua ez ote zen posiblea izango: janzte publiko, elkar ukitze eta solasaren bitartez, beldurrean baino laguntasun eta maitasunean oinarritutako harremana bilatzea alegia.”
Euskara izango da azkenik ekimenaren ardatzetako bat, “solasaren ideia horri lotuta, euskararen beharra zegoen, buruhandi berrien berbak euskara hutsez beharko zirelako” gaineratu dute.
Herriko taldeekin elkarlana
Erraldoi eta buruhandi berriak kalejiratan ateratzeko taldea dinamizatuko du Basalarrinak, herriko jai eta ekitaldi ezberdinetan konpartsaren parte hartzea bermatzeko talde zabala lortu nahi dutelarik.
Herriko talde ezberdinekin elkarlana sustatu nahi du Basalarrinak ekimenarekin, nahi duen orok beraien ekitaldietan erabili ditzan.
Konpartsak eskainiko dituen emanaldiak elikatu asmoz, eskualdeko kondaira eta herri ipuinen bilduma osatzeko asmoa du Basalarrina Elkarteak.