Laudioko Udaleko gobernu taldeak 2013 urteaz geroztik Ermualde inguruarekin lotuta garatzen ari diren ekimenen balantzea eta datozen bi urteetarako, 2016 eta 2017rako, dituen egitasmoen berri eman du.
Ermualde ingurua babesteko eta kontserbatzeko plan berezia ardatz hartuta eta Euskal Herriko Unibertsitatearekin izenpetutako hitzarmena baliatuta Laudio herriaren ondare historiko honen berreskurapenean eta balioan jartzeko dinamikan emandako urratsak azaldu berri ditu Jon Ander Altubek, lehen alkate ordeak.
800 bisitaritik gora indusketatan
Ermualden garatzen ari diren indusketetarako bisita gidatuek izandako arrakasta azpimarratu zuen Altubek proiektuaren hedapen sozialerako ekimenen balantzea egitean. 800 bisitari baino gehiego hurbildu dira Santa Luziara uztailan eta udazkenean zehar bideratu diren ate ireki eta bisita gidatu programatan.
Horrez gain, Ermualde inguruan dauden gerra zibileko aztarnen azterketa eskaintzeko eta Sergio Escribanok zuzendutako EHUko ikerlari taldeak egindako lanak ezagutarazteko egindako hitzaldi sortak ere burutu dira 2014 eta 2015 urteetan.
Hedapen digitala
2016 eta 2017 urteetarako egitasmoei dagokienez, proiektuaren hedapen digitala garatzeko aukerak, arte higigarriaren museo birtuala edo indusketen erakusketa birtuala kasu, aztertzen ari direla aurreratu zuen Jon Ander Altubek.
Izan ere, Eusko Jaurlaritzako Kultura Sailak 2015-2017 aldian Ermualdeko balioa nabarmendu eta hedatzen jarraitzeko 45.967 euroko diru-laguntza ebatzi berri du Euskal Kultura Ondarea babestu eta zaintzeko abian duen programa barruan. Orotara, 71.338 euroko inbertsioa burutuko dela argitu zuen Altubek, Udalak 17.100 euro baliatuko ditu indusketak finantzatzen jarraitzeko eta Jaurlaritzak emandako gainerako diru partidekin lan arkeologikoen hedapen soziala garatuko da.
Asmoa 2016an zehar indusketa berriak garatzea da eta 2017an gidatutako bisita programa berriak garatzea.