Iragan ostiralean ireki zuten Latiorrora joateko tren geltoki ondoan eraikitako tunel berria. Hori dela-eta, auzokideek asanblada antolatu zuten prozesuaren berri emateko. Pozik agertu ziren, izan ere, urte luzez egindako lanaren fruitua dela defendatzen dute.
Hamabost urte bete dira Laudioko Udalak “Maderas” enpresa inguru horretatik ateratzeko akordioa sinatu zuenetik. Bertan kokatzen dute Latiorroko auzo asanbladako kideek lanaren hasiera. Asanbladetan bildu, hausnarketak auzokide guztiei helarazi, proposamenak postontzietara bidali, Udalarekin harremanean jartzeko batzordea sortu, mozioak aurkeztu… anitza izan da auzo asanbladatik egin duten lana. Fruituak ere, tunelaz haratago joan dira.
Prozesuan zehar, auzokideek egindako ekarpen eta eskaerei esker, eskailera mekanikoak edota 158 kotxerentzako aparkalekua eraiki dituzte. Haien arabera, ez da erraza izan Udaleko ordezkariei horien beharraz konbentzitzea. Zentzu horretan, herritarrei lan egiteko modu hori jarraitzeko gonbitea luzatu diete, aurretik dauden erronka desberdinei aurre egiteko ezinbestekoa dela uste baitute.