Itxaso Escondrillas eta Ibone Sanchez atleta laudioarrak Euskadiko Kros taldean Espainiako Txapelketara ez joateko eman den plantoan hartuko dute parte.
Lasterkariek Madrilgo kirolari batek Espainiako Txapelketan lehiatu ahal izateko Euskadi eremuko taldeetan fitxa egiten duela salatu nahi dute plantoaren bidez, hortaz, ez dira izango igandean Alcobendasen lehiatuko den Espainiako txapelketan.
Zazpi lasterkaritik gora azaldu dira plantoaren alde eta momentu honetan Euskadiko taldea osatzeko arazoak ditu Euskadiko Federazioak. Gatazkaren jatorrian, Penélope Baños atleta madrildarrak Atletico San Sebastian taldeko fitxa baliatuz Espainiako txapelketan parte hartzea ahalbidetuko dion tokia eskuratu duela dago.
Euskal lasterkariek prozedura horrek bertoko kirolariei lehiaketarako tokiak murrizten dizkiela salatu dute hedabideetan zein sare sozialetan. Penélope Baños Gipuzkoan ez dela bizi azpimarratu dute kirolariek.
Lehen Madrileko taldean orain Euskadiko taldean
Atleta madrildarrak antza Espainiako Txapelketarako tokia Madrilen berton eskuratu ohi du promesa kategorian izan den bitartean, baina senior moduan aritzean lehiakide kopuru eta maila handitzean, fitxa beste Erkidego batean bideratu du Txapelketarako aukera bermatzeko.
Protestan ari den lasterkari taldeko kideek honelako prozedurak hiru urtez Federazioaren aurrean salatu dituztela adierazi dute.