Inbertsio berriak egingo ditu Laudioko Udalak. Horretarako, pasa den astean aurkeztutako 2014 urteko soberakinak baliatuko ditu. Hori oinarri hartuta, eranste dekretua onartu dute. Bertan, martxan dauden edota datozen astetan hasiko diren lanen inbertsioak jasotzen dira.
Besteak beste, Etxebarri baserria, Lamuza parkeko kasinoa, bideen asfaltatzea, Ugarteko plaza eta Foru Plana aipatzen dira. Etxebarri baserriko proiektuan 57.000 euro inbertituko dira. Momentu honetan lizitazioan aurkitzen da. Lamuza parkeko kasino zaharra, aldiz, konpontze lanetan dago, 34.000 euroko inbertsioarekin.
Bideen asfaltatzerako 233.000 euro erabiliko dira. Zehazki Gardeako zatia egingo da. Ugarteko plazari dagokionez, 117.000 euro inbertituko dira konpondu eta auzokideek eskatutako plaza bien arteko lotura burutuz.
Azkenik, 500.000 euro aipatzen dira, Foru Planari dagozkionak. Plan horretan tren geltokia, tunela eta Elorza Maisua kalean egiten ari diren obrak jasotzen dira.
Guztira, aipatu gabeko esku hartze txikiagoak kontutan hartuz, 1.088.742 euro inbertituko dira. Asteleheneko osoko bilkurara, ordea, proposamen berria eramango du udal gobernu taldeak, onartua izateko. Bertan, eranste dekretuan jasotakoaz gain, Foru Planerako 568.502 euroko gehikuntza planteatuko dute.