Gernikan, Sestaon eta Bilbon bideratutako kultur kudeaketa esperientziak gonbidatu ditu SOS parkeak 2015 urterako aurkeztu berri duen jardunaldi programaren lehen saiorako. Ekimen honen bitartez Lamuza Parkerako funtzionamendu proposamen bat garatzeko prozesuan bertoko talde eta elkarte kulturalen ideiak eta beharrak lantzeko erreferentzia aberasgarriak ezagutarazi nahi ditu Laudioko plataforma herritarrak. Zikloak “Amets bat gauzatu” lema izango du.
Lehen saioa urtarrilaren 24rako, larunbata, deitu dute Laudioko Kultura Etxeko 3. gelan. 11:00etatik eguerdi bitarteko hitzordu irekia prestatu dute, azken orduko mokadu batez lagun arteko solasaldi gisa amaitzea espero dutena.
Astra, Txirbilenea eta Pabellon 6
Lehen saioko protagonistak birgaitutako hiru espazio kultural, Gernikako Astra, Sestaoko Txirbilenea eta Zorrozaurreko Pabellon 6, izango dira.
Gernikako Astra “Astra Unceta y Cia” arma lantegi zaharreko eraikinetako bat berreskuratu eta bertan Kulturarako Fabrika Soziala gauzatzeko egitasmoa da, Sestaoko Txirbilenea berriz, bertoko Labe Garaietako aprendiz eskolaren okupazioaren ondorioz sortutako esparru autogestionatua da eta Zorrozaurreko Pabellon 6 arte eszenikoen sorrera eta promoziorako antzerki eta dantza alorreko norbanako ezberdinek sortutako proiektua da.
Antolatzaileek esperientzia bakoitzak erakunde publikoekin garatutako harremanak, beraien antolaketarako jorratutako eredu eta bideak zein garatzen dituzten kultur ekimenen nondik norakoak partekatzeko ariketa proposatuko dute jardunaldian.
Jardunaldietako hurrengo saioei begira, bestelako esperientziak aztertzeko gogoz agertu da SOS Parkea plataforma eta proposamenak luzatzeko gonbidapena luzatu die herritarrei.