Arabako Foru Aldundiarekin pasa den astean elkartu ostean Lamuza parkearen egoera bideratzeko prozesuak aurrera egin ez duela salatu du udal gobernu taldeak. Bileran musikaren etxearen egoeraz mintzatu ziren.
Horren harira, AFAko ahaldun nagusia den Javier De Andresek ideia desberdinak plazaratu dituela jakinarazi du udalak. Hala ere, aurreproiekturik ez eta horrekin denbora luzatzen ari direnaren sentsazioa dute Udaletik.
Momentuz 60.000 euroko obra txikia egingo da, eraikinaren hondamendi teknikoa saiheste aldera.
Hala ere, Udalarentzat ez da nahikoa eta herritarrei adarra jotzeari uzteko eta inbertsio bidezko konponbide errealak bilatzeko eskatu diote De Andresi.
“Argazki gutxiago eta errealitate gehiago”, esan diote Ahaldun Nagusiari SOS Laudioko Lamuza Parkea plataformaren aldarria sinatu izanaren aurrean. Zentzu horretan, 2011n onartutako 3 milioi euroko kreditua, eta gerora ukatu zena, gogora ekarri dute.
Udalaren ustez AFAtik proiektu bat proposatu behar dute, ondoren Udalarekin berarekin eta parkearen aferan lanean dauden eragile sozialekin eztabaidatzeko.
Gainera, Udalaren esku dauden eraikinetan inbertsioak egin direla defendatu dute, baita kultur etxearen gehiengoa egunerokotasunean martxan dagoela aipatu ere, besteak beste eraikin nagusian milioi bat euroko inbertsioa egiteari esker.
Hitzarmena
Bestalde, Arabako Foru Aldundiak eta Laudioko Udalak parkearen inguruko hitzarmena berrituko dutela adierazi dute. Baina ez dute eperik zehaztu horretarako.