Gaur hasiko dira Latiorroko jaiak. Arratsaldeko 19:00etan jaurtiko da txupinazoa, ondoren buruhandiekin batera kalejirari ekiteko. Egitarau oparoa dakarte aurtengo jaiek, hiru egunez luzatuko dena.
Besteak beste, umeek Nai malabaristarekin gozatzeko aukera izango dute gaur. Horretaz gain, tabernetan eta txosna gunean pintxo-potea eskainiko dute, ostiraletan lege den moduan. Graffitti erakusketa eta ondoren kontzertuek emango diote amaiera egunari, Red Lotus, Kaotiko eta Disko Dantza ikuskizunekin.
Larunbata goiz hasiko da festazaleentzat. Goizeko 8:00retan mendi martxa egingo dute. 18km inguruko ibilbidea izango da, Pagolar, Santa Marina, Jesuri eta Elorritxugane mendietatik. Goizeko eskaintza gustu orotarikoa: baserritar azoka, umeentzako jolasak, emakumezkoen paleta erakusketa eta igel nahiz pin-pon txapelketa, ondoren herri bazkarian hustutako sabelak betetzeko.
Arratsaldean mus txapelketa, zaldi proba eta txosna gunean pintxo-potea, egunaren muinera Txapelpunk eta Garilak 26ren kontzertuekin heltzeko.
Igandea izango da azken eguna. Larunbatean bezala, goiz jaiki eta 8:00retan ekingo zaio marmitako txapelketari. Tartean herri kirolak eta txapelketaren sari banaketa, ondoren sukaldatutakoaz gozatzeko. Jaien azkeneko txanpan, Bingoa, mountainbike gynkana, Uluka musika taldearen ikuskizuna eta txokolatadaz gozatzeko aukera egongo da.