Hamar eguneko atsedenaldia eta gero, asteazkenean, hilaren 27, hasiko da Laudioko jaien bigarren zatia. Lehenengo zatiarekin alderatuta, berezitasun handiena Zumakalarregin jarriko den eskenatokia izango da. Bertan Doctor Deseo taldea arduratuko da jendea mugiarazteaz. Abuztuaren 29an izango da, Baserritar eguna, gaueko 23:00etatik aurrera. Txosnetako kontzertuak, ordea, Zumalakarregikoa bukatu eta berehala hasiko dira. Eskaintza berezia egin dute aurten, musika jartzaileek presentzia garrantzitsua bereganatuta. Hala, bigarren txanpan, Berakatz eguneko sesioz gain, Patrol Destroyers eta Las Tea Party arituko dira.
Ez dira, ordea, kontzertuak jaietako eskaintza bakarra izango. Emakumezkoen gomazko pilotadun paletako finala Lamuza frontoian, bazkari herrikoiak, hala nola erromeria nahiz kantukadaz gozatzeko aukera egongo da asteazkenean. Ostegunean, aldiz, koadrilen eguna, koadrilen bazkariarekin eta ondoren, urteroko tradizioari jarraiki, karaokea eta muturreko herri kirolen ospakizunarekin. Kulturen arteko azoka, antzerkia, gabarren jaitsiera, nahiz musika eskaintza desberdinek osatuko dute eguna.
Baserritar egunean, bolatoki lehiaketako sari nagusiak emango dio hasiera jaiari. Ondoren, pintxo txapelketa, bazkari herritarra, erraldoi eta buruhandien kalejira, herri kirolak nahiz kalejira, eguna musika eskaintza zabalarekin bukatzeko. Gainera, Txosnen barrutian, eraso sexisten aurkako bertso musikatua egongo da 20:30etatik aurrera. Odoloste egunean, ordea, boloek presentzia nabarmena hartuko dute. Horiekin batera, berbena eta disko festa eskaintza egongo da, gau aldean.
Hilaren 31 izango da jaiei amaiera emateko eguna. Kale animazioak eta azken orduetako musikariak izango dira eguneko jai giroaren arduradun nagusiak.
Barrakak euro batean
Berakatz egunean eta irailaren 1ean barrakak euro batera egongo dira. Ohiko prezioa 1.5 eurokoa da. Merkeak dira beste herri batzuekin konparatuta udalak ez dielako lurzoruaren alokairua kobratzen.