Astelehenean ez-ohiko osoko bilkuran Laudioko Udalaren Lanpostu Zerrenda eztabaidatuko da. Omniak, onartzeko prestutasuna duela esan arren, kritika desberdinak egin ditu. Plataformak dioenez gaurko egunean astelehenerako beharrezkoa duten dokumentua faltan dute, euskara arloko nagusiaren txostena, hain zuzen ere. Bertan, Euskara Plan berria onartu eta gero beharrezkoa den lanpostuen balorazioaren ondorioz sortutako lanpostu berrien inguruan hitz egiten da. Horri lotuta, Udal Gobernu Taldeak lanpostu guztietarako proposatutako beharrezkotasunaz mintzo den informea ere ez dutela jaso adierazi dute.
Omniaren arabera gobernu taldetik jaso duten balorazioan legea hausten da. Izan ere, bertan sei lanpostuetan salbu, beste guztietarako euskara eskatzen dute. Plataformaren arabera, ordea, legeak soilik lanpostuen %39an derrigortzen du, guztira 85 direlarik. Gainera, udaletik beharrezkotasunaren data legeak baimendutakoa baino urte eta lau hilabete gehiago luzatu nahi dela salatu dute.
Bestalde, lanpostuen balorazio berriari lotuta, kostua 218.000 eurotan handituko dela kritikatu dute Omniatik. Izan ere, bertan soldaten igoera planteatzen da. Horren harira, ekonomi finantzariorako bideragarritasun plana eskatu dute, balorazioak atzera eraginezko ondorioak dituelako, 2013ko aurrekontuei eraginez.