[video:http://www.youtube.com/watch?v=1keM1lkF46Y&feature=youtu.be width:380 height:250]
Nahiz eta 18:30ean eguraldia zakartu den jende ugarik parte hartu du SOS Lamuza Parkea platafomak deitutako mobilizazioan. Adin askotako herritarrak hurbildu dira eta hainbat alderdien ordezkarik ere -Bildu, EAJ eta Omniakoak, adibidez- bere babesa eman diote ekimenari.
Manifestazioak Kultura Etxetik abiatu eta Kasinora jo du. Modu sinboliko horretan, plataformako kideek gogoratu dute Musika Etxea ez ezik Kasinoak ere konponketak behar dituela.
Horren ostean pankarta eraman duten pertsonek gainerako manifestariak Musika Etxera bideratu dituzte. Bertan minutu batzuk eman eta gero Kultura Etxera itzuli da mobilizazioa eta hortik Herriko Plazara joan da.
Enparantzan plataformako kide batek manifestua irakurri eta Arabako Foru Aldundiari hurrengoa eskatu du:
"Lamuza Parkearen Plan Berezian jasotako larrialdiko esku-hartzea berehala gauzatzea eraikinak erori ez daitezen.
Parkeko ondare historikoa, bereziki Musika Etxea eta Kasinoa, botako ez direla bermatzea eta bere mantenuan pausoak ematea.
Parkeko ondare historikoa Laudioko herritarren erabilerarako izatea, bere behar soziokulturalak asetzeko."
Horretaz gain, plataformak sinadura bilketa fisikoa hasi du -ez birtuala, orain arte bezala- eta hurrengo asteartean Kultura Etxean 18:30ean egingo den bilerara gonbidatu ditu herritarrak.
Mobilizazioa bukatutzat emateko taldeko argazkia egin dute.