Andra Mari nagusien egoitzaren kudeaketa lehiaketa publikora ateratzeko pleguak onartu ziren atzo Orozkoko Udal Osoko Bilkuran. “Hamar urtez egon da enpresa bera egoitza kudeatzen, eta kontratazio berria abian jartzeko unea heldu da”, adierazi du Josu Sanpedro alkateak udalbatzan.
Sei urteko iraupena izango du esleipenak eta lau urte gehiago luzatu ahalko da. “Modu horretan, uste dugu berme ugari ematen diegula aurkezten diren enpresei, zerbitzu hobea eskaintzeari begira”, azaldu du.
Haren esanetan, baldintza-agirietan baloratu egingo dira enpresen ziurtagiriak. “Prezioen beherakada horrenbeste sarituko ez duen formula nahi dugu. Ez dugu dirua aurreztea bilatzen, zerbitzua ahalik eta modu egokienean eskaintzea baizik”.
Oposizioaren onarpena
Oposizioko bi taldeek (EAJk eta EH Bilduk) begi onez ikusi dituzte gobernu-taldeak aurkeztutako oinarriak. Hala ere, EH Bildu abstenitu egin da bozketan, argudiatuta zerbitzua Bizkaiko Foru Aldundiak bere osotasunean kudeatu beharko lukeela.
Kontratazioan zehazten denez, egoitzak 43 plaza izango ditu: 36 kontzertatuak, 4 munizipalak eta hiru pribatuak.