Urduñako Bainuetxeko langileen etorkizuna zalantzakorra da, LAB sindikatuak adierazitakoaren arabera. Izan ere, abenduaren 9an lanpostu guztien desegite espedientea aurrera eramateko kontsulta sasoia hasi zen. Langileen arabera, egoera Montenegro Taldeak bideratutako gestio txarraren ondorio da.
Taldea irailetik hartzekodunen lehiaketan aurkitzen da. Hala ere, traba eta trikimailu desberdinak erabili dituztela salatu dute langileek. Haien arabera, Taldetik errentagarriak izan daitezkeen enpresak banatu zituzten hartzekodunen konkurtsoan sartu aurretik. Horrekin batera konponbidea bilatzeko saiakerarik egin ez dela uste dute, etekinen alde egin delako, langileen egoerari bizkarra emanez.
Ez da izan, ordea, Montenegro Taldea sindikatuaren kritikak jaso dituen bakarra. Administrazio konkurtsalari langileekiko gardentasun eza egotzi diote. Kontaktu bakarra izan dutela eta ez dietela informaziorik eman, ezta balizko inbertitzaile baten ingurukoa ere. Antza, azkeneko horrekin akordioa lortzear zegoenean enpresak Gizarte Segurantzarekin duen zorra azaleratu da. Guztira 170.000 euro, astero 10.000 euroko igoerarekin.
Horren harira, Gizarte Segurantzako Diruzainaren jarrera desegokia dela uste dute sindikatuko kideek. Izan ere, zorra kobratzeko gestioan zorrotz agertzea leporatzen diote, lanpostuak mantentzeko beharrekoak diren etorkizuneko akordioei ateak itxiz.