Herri galdeketak ezaugarritu du maiatzaren 6a eskualdeko 6 herritan. Izan ere, Artziniegan, Okondon, Aiaran, Amurrion, Laudion eta Arakaldon 30.000 herritarrek izan dute erabakitze eskubidearen inguruko kontsultan parte hartzeko aukera, eta %16.86ak babestu du kontsulta.
Emaitzak herrika
Herri txikietan bildu ditu Aiaraldea Bat elkarteak boto-emaile gehien. Hurrenez hurren, ondorengoak dira eskualdean kontsultak izandako parte hartzearen ehunekoak, Gure Esku Dagoren arabera:
- Arakaldo: Parte hartzea %25,60 (32 boto); baiezkoak 32.
- Okondo: Parte hartzea %27,41 (264 boto), baiezkoak 257, ezezkoak 5, zuriak 2.
- Artziniega: Parte hartzea %19,53 (289 boto); baiezkoak 274, ezezkoak 3, baliogabeak 1, zuriak 11.
- Aiara: Parte hartzea %18,84 (449 boto), baiezkoak 428, ezezkoak 5, zuriak 14, baliogabeak 2.
- Amurrio: Parte hartzea %17,01 (1.485 boto); baiezkoak 1.442, ezezkoak 20, zuriak 13, baliogabeak 10.
- Laudio: Parte hartzea %14,65 (2.328 boto); baiezkoak 2.275; ezezkoak 32, zuriak 14, baliogabeak 7.
Arrankudiaga-Zollon eta Orozkon aurreko urteetan antolatu dituzte herri galdeketak. Hortaz, Urduña da gaur-gaurkoz Aiaraldean kontsulta egin ez duen herri bakarra.
Emozioa nagusi
Momentu hunkigarriak utzi ditu egunak, zenbait herritan. Amurrion, esaterako, sahararrak euren herrialdeko banderarekin adierazi dute babesa. Juan Jose Ibarretxek 10:00ak aldera egin du agerraldia Laudioko Ugarte plazan. Hedabideei, baina, ez die adierazpenik eskaini. Aiaraldea komunikabideari arrazoia azaldu dio: "Ni ez naiz gaurko protagonista".
Laudion bozkatu dut. Urratsez urrats, bai, baina etengabe. Aitarekin gogoratu naiz, beste pertsona askorekin ere... A ze poza!
— Juan Jose Ibarretxe (@LHKibarretxe) 2018(e)ko maiatzaren 6(a)
Arakaldon, aldiz, 93 urteko emakume batek hunkituta sartu du boza ontzian, Jabi Asurmendik kontatu duenez:
#Arakaldo-n gaurko kontsulta egunaren unerik polita eta hunkigarriena zalantzarik gabe herriko pertsonarik nagusienak bozka eman duenean, 93 urterekin, kementsu, gogotsu, ... eta maitagarria! Jende zoriontsua herri libre batean! #M6galdeketak #etorkizuna @GureEskuDago @aiaraldea pic.twitter.com/4hpPn3Jk7Z
— Jabi Asurmendi (@jabiasurmendi) 2018(e)ko maiatzaren 6(a)
