Basarteko futbol zelaian neurtuko dira bihar Amurrio Club eta CD Laudio. 19:00etan hasiko da norgehiagoka, zuri-urdinen zelaian, eta lehia estua izango da. Izan ere, bi taldeak berdinduta daude Arabako Gizonezkoen Ohorezko Mailako sailkapen orokorrean, 34 punturekin.
Azken derbiko arantzak kentzeko gogoz
Joaneko partidako arantza kentzeko asmotan bertaratuko da CD Laudio Basartera. Azaroan jokatutako derbian zuri-gorriek 2-3 galdu zuten Amurrio Cluben aurka. Ellakuriko porrot horrek egoera delikatuan utzi zuen Laudioko taldea, garaipenak lortu ezinik eta sailkapeneko azken postuetatik gertu. Hori dela eta, entrenatzaileak aldatzea erabaki zuen klubeko zuzendaritzak, derbiaren biharamunean.
Gaur gaurkoz, ordea, oso bestelako egoeran aurkitzen dira laudioarrak. Azken zortzi norgehiagoketan ez dute porrota ezagutu; sei partida irabazi eta bi berdindu dituzte. Gainera, hiru gol jaso dituzte soilik, eta, kontrara, 22 sartu.
Amurrio Club ez da hain une goxoan iritsiko derbira, baina azaroko emaitza errepikatzeko ahalegina egingo dute zuri-urdinek. Azken zortzi partidetatik bi irabazi dituzte, hiru galdu eta beste bi berdindu. Aipatzekoa da galdutakoa azken partida sailkapeneko liderra den Aurrera talde gasteiztarraren aurka izan zela.
Gauzak horrela, eta eguraldia lagun, partida bizia aurreikusi dute bi klubek biharko.