🔴 AMURRIOKO UDALAK DIRU-LAGUNTZA KENDU DIO ESKUALDEKO EUSKARAZKO KOMUNIKABIDE BAKARRARI 🔴
📝 Eman atxikimendua eta babesa komunikabideari HEMEN SINATUTA 👇
www.labur.eus/amurrioneuskarazbizinahidugu
📍 Ekainak 21, ostirala, AGERRALDI HERRITARRA Amurrioko Juan Urrutia plazan, 19:30ean.
Lezamako Ezker Abertzaleko familia baten etxearen kontra egindako tiroaren egiletza argitu behar zuen epaiketa akordioarekin amaitu da gaur. 09:30ean hasi behar zen Gasteizko epaitegietan, baina akordioa erdietsi dute fiskaltzak, defentsako abokatuak eta akusazio partikularrak. Negoziazio luzea izan da eta horren ondoren Lezaman bizi den polizia ohiak onartu du berak egin zuela tiroa eta hiru urte eta bederatzi hilabeteko espetxe zigorra ezarri diote, kalteak eragiteagatik (200 euro ordaindu beharko ditu) eta gerra armak biltzeagatik. Gainera, sei urtez eta bederatzi urtez armak edukitzeko debekua izango du.
Erabaki horrekin amaitu da bost urteko ibilbidea familiarentzat, baina ez, ordea, erasoaren egilearentzat, indultua eskatu eta lortu beharko baitu espetxean ez sartzeko. Edonola ere, horren alde ere egin du akusazio partikularrak, zigortuaren adina aintzat hartuta (ia 80 urte ditu), besteak beste.
Polizia nazional ohiak indultua eskatu beharko du espetxeratzea ekiditeko
Gauzak horrela, polizia nazional erretiratuak bere gain hartu du 2019an tiro egin izana Lezamako Ezker Abertzaleko familiaren etxearen kontra, bizilagunak barruan zeudelarik, gainera.
Arma biltegia etxean
Gaur tiroaren ardura hartu badu ere, egun berean (hau da, 2019ko urtarrilaren 6an) eta hurrengoetan egileak ez zuen egindakoa onartu. Urtarrilaren 10ean, ertzainak etxea miatzera joan zirenean, akusatuak ez zuen ukatu tiroa egin izana eta gertakariari buruzko hainbat azalpen eskaini zituen. Jarraian, modu boluntarioan, agenteak gidatu zituen erabilitako armaren ezkutalekura: bere etxean zegoen zulo natural bat, harriekin estalitakoa. Star markako 9 milimetroko pistola luzea zen erabili zuen arma, eta akusatuak ez zuen hori izateko beharrezko baimenik.
Dena den, miaketa horretan eta aurreko egunetan egindako esku-hartzeetan Ertzaintzak arma biltegi handia aurkitu zuen. Besteak beste, bederatzi pistola topatu zituzten, horietako asko baimenik gabekoak edota erregistroa ezabatuta zutenak.
Familiaren balorazioa: lasaitasuna
Bere etxea tirokatua ikusi zuen familiak lasaitasunez hartu du prozesuaren emaitza. Azpimarratu dute justiziak zein zigortuak bost urte izan dituztela neurriak hartzeko, eta polizia ohiak denbora izan duela aurretik kontuak argitzeko.
Edonola ere, senideek positibotzat hartu dute epaiak frogatutzat jasotzen duela tiroa ez zela kasualitatez gertatu eta euren etxearen kontra apropos egin zuela, arrazoi politikoengatik, euren ustez.
