aiaraldea.eus

[EGUNERAKETA] Ertzaintzak gizon bat identifikatu du Ezker Abertzaleko familiaren baserriaren aurkako tiroaren harira

Erabiltzailearen aurpegia Erredakzioa   Jendartea  Amurrio  Amurrio: Lezama

Poliziak Aiaraldea hedabideari nabarmendu dionez, oraindik ez da atxiloturik egon. Naiz hedabidearen arabera, identifikatua polizia nazional ohia da. Sortu alderdiak "oso larritzat" jo du gertatutakoa eta mobilizazioa deitu du biharko, 19:00etan Amurrion.

[EGUNERAKETA] Ertzaintzak gizon bat identifikatu du Ezker Abertzaleko familiaren baserriaren aurkako tiroaren harira
Sukaldeko leihotik sartu zen bala. / Aiaraldea.eus | Ikusi handiago | Argazki originala

Tiro bat bota zuten atzo goizean ezker abertzaleko familia baten baserriarren aurka, Lezaman. 9 milimetroko bala bat sartu zen etxeko sukaldera, leihotik. Ertzaintza etxebizitzara bertaratu da eta ikerketa abiatu du.

Lekukoek salatu dutenez, ezin da ehiztari baten bala galdu bat izan eta ez da ezta familia arazo edo liskar baten ondorioz izan. Era berean, nabarmendu dute gertaera jazo den unean etxean jendea zegoela eta, ondorioz, arrisku handia pairatu dutela.

Identifikatu bat
Ertzaintzak Aiaraldea hedabideari jakinarazi dio ikerketa ireki dutela eta momentuz ez dela atxiloturik egon. Hala ere, gizon bat identifikatu dute, gertaeran inplikatua egon daitekeelakoan. Naiz hedabideak, bere aldetik, identifikatua polizia nazional ohi bat dela adierazi du.

Mobilizazioa bihar
Sortuk, bere aldetik, gertakaria salatu du: "Espainiar Estatuan triunbiratu aznartarra sustatzen ari den inboluzio gaiztoak halakoei bide ematen die". Alderdiak "oso larritzat" jo du gertatutakoa, eta testuinguru batean kokatu behar dela nabarmendu du, Julen Ibarrolaren eta Alfredo Remirezen kasuak aipatuta. Manifestazioa deitu dute biharko. 19:00etan izango da mobilizazioa, Amurrion.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa