Erabakitzeko eskubidearen aldeko zita garrantzitsua antolatu du Gure Esku Dago mugimenduak larunbat honetarako. Euskal Herriaren eta Kataluniaren arteko 300 gailur argiztatuko dituzte ehunka herritarrek, L’Assemblea Nacional Catalana eta Federació d'Entitats Excursionistes de Catalunyarekin batera, eta Omnium antolakundearen babesarekin.
Aiaraldeko Gure Esku Dagok asteak daramatza asteburuko ekimena prestatzen. Adi mendira joko dute aiaraldearrek, eta 14:00etan abiatuko dira autobusak Laudio, Amurrio eta Urduñatik.
Orozkoko ekimena
Orozkoko Gure Esku Dagok ere luzatu du ekimenean parte hartzeko gonbita, baina beste egitasmo bat ere aurkeztu du, Orozkon bertan. Ekimen “sinbolikoa” izango da, eta Piriniotan egingo da ekintza jendetsua jendarteratzea izango du helburu. Argi-lerro bat osatuko dute Oderiaga eta Urizar artean, 4x4 ibilgailuak eta jeep-ak baliatuta. 20:30ean abiatuko dute ekimena, argi-lerroa 23:00etarako egon dadin prest.
Dena dela, baldintza klimatikoak kontuan hartuko dituzte antolatzaileek. “Eguraldi txarra egin ezkero bertan behera geratuko litzake ekimena”, zehaztu dute.
Amurrion, Guk eskultura
Amurrion ere ekimena egingo dute larunbatean, baina herrigunean. Guk eskultura argitaztuko dute, 22:15etatik aurrera. Herritar orori luzatu diote bertaratzeko gonbita, eta Txoriak txori abestia kantatuko dutela aurreratu dute.