.JPG)
Bi urterik behin errepikatzen den zita berezia dugu Korrika, agendan kolore gorriz azpimarratzen den horietakoa. Hamaika ekintza, auzolana, herriz herri egitaraua duen horietakoa. Euskararen aldeko ekimenik erraldoiena, euskaldunon inbentario kolektiboko izarra. Asko dira partekatzen ditugun oroitzapenak, erretinan grabatuta geratu zaizkigun irudiak, sentitutako emozioak.
Zirraraz begiratu dugu gure herritik noiz igaroko den ibilbidea atera den egunean, birbidali digute hitzordua eta birbidali dugu, streaming bidez jarraitu dugu uneren batean Korrika, sareak korrikaz bete zaizkigu, eta lekukoan gordetako mezua nork idatzi duen asmatzen saiatu gara kuadrillan.
Ikusi dugu, elurtutako furgoneta bultzaka aurrera eramaten, ikusi ditugu goizaldeko ordu txikietan ilunpetan korrikalari bakartiak, ikusi ditugu hiriburuetako kaleak jendez lepo.
Sentitu dugu emozioa, hunkidura gure kilometroaren zain korrika heltzear zela jakitean, musika entzuten hastean, furgonetako argiak gerturatzen ikustean. Bihotza pil-pilean / tik-tak, tik-tak, tik-tok.
Hunkitu gara lekuko barruko mezua lehen aldiz plaza betean entzutean, adinduak irribarrea ahoan lekukoa hartzean.
Herri bezala bizi izan dugu, taldean, eta hori da denik eta gauzarik ederrenetarikoa, hizkuntzak batzen gaituela ikustea, euskal komunitatearen parte sentitzea.
Munduko korrikak ikusi ditugu, Tokion zein New Yorken, Argentinan eta Laponian. Ikusi dugu nola Korrikak erditu dituen ahizpa txikiak (bretorieraren alde, katalanaren alde, galizieraren alde, okzitanieraren alde, galesaren alde, gaelikoaren alde, alsazieraren alde, mapuzugun hizkuntzaren alde edo korsikeraren alde). Hizkuntza gutxituetako hiztunak euren hizkuntza aldarrikatzen ikusi ditugu. Jatorri, ideia eta izaera anitzeko pertsonak biltzeko parada eskaintzen du Korrikak, eta ez da erronka makala hori lotzea.
Harro egoteko moduko ibilbidea du Korrikak. Harro egoteko modukoa da herriz herri antolatzen diren ekintzak ikustea. Euskararen aurkako sententzien, oldarraldiaren eta traba guztien aurrean gure izena eta izana harro aldarrikatzen segi dezagun, eta izan dadila suspergarria eta energia emailea, hurrengo Korrikara arte eman diezagula oztopoei aurre egiteko behar dugun energia dosia.
Ez badigute ematen, / arrazoia guri / Su emango diogu, / haien legeari