Zaila egiten zitzaidan Euskal Herritik kanpo Korrika bizitzea, eta zenbat eta zenbat momentu galduko nituen pentsatzea. Beti da berezia Aiaraldean eta Araban korrika egitea. Oso berezia.
Baina onartu behar dut, Euskal Herritik kanpo bada ere, Korrikak ez duela dezepzionatzen. Ez horixe! Eta aurtengoa berezia izan da baita, bere modura. Bartzelonako kaleak aldarriz betetzea, eta euskarak ere Herri Katalanetan duen aitortza sentitzea polita izan da.
Korrikak Euskara du helburu, hizkuntzaren eta hizkuntz eskubideen aldeko ekimena izatea, hain zuzen ere. Baina Bartzelonan ospatzen den Korrikak badu, nire ustez behintzat, beste helburu nagusi bat: bi hizkuntza zapalduen arteko ahizpatasuna indartzea. Euskarak zein Katalanak pairatzen duten erasoaldiaren aurrean, bi hizkuntzen arteko aliantzak indartzea ezinbestekoa zaigu. Hizkuntza gutxituen etengabeko borroka honetan, beharrezkoa da hizkuntza eskubideen aldeko defentsa egitea, tokian tokiko hizkuntza errespetatzea, ikasi zein irakatsiz Euskara eta Katalana gure mugetatik kanpora ateratzea, eta bidean elkar-indartzea ere.
Eskerrik asko antolatzaileei, Bartzelonako gazte mugimenduari, auzoak bizitzaz betetzen dituzuen taldeei, Euskal Herritik kanpo ere euskaraz hazten zareten ume eta familiei, zuen kulturaren alde antolatzen zaretenoi, euskara irakatsi eta ikasten duzuen ikasle eta irakasleei, eta katalanaren alde egiten duzuen bezala, Euskararen alde ere korrika egin zenuten denei!
Biba zuek! Visca la llengua catalana! Gora Euskara! Ni un pas enrere!
Argazkiak: Joanna Chichelnitzky