Arabako Foru Aldundiak 490.694 euro inbertituko ditu datozen hilabeteetan zortzi landa gunetara sartzeko bideen zorua hobetzeko; bai eta beste sei errepideren errodadura geruza ere, egiaztatu baita hondatuta dagoela.
Inbertsio horri esker erosoago eta seguruago bidaiatuko dute Menoio, Madaria, Bachicabo, Labraza, Okariz, Alangua, Arrizabala eta Barriara doazenek.
Diputatuen Kontseiluak gaur esleitu du Arabako errepideak zaindu eta hobetzeko proiektu hori egiteko kontratua, zenbateko horretan eta bi hilabeteko gauzatze epearekin, Josu López Ubiernak zuzentzen duen Bide Azpiegituren eta Mugikortasunaren Sailak hala proposatuta. Lanak abuztuaren bukaeran hasiko dira ziurrenik.
Kontratuari esker hobetu egingo da lurralde historikoko zortzi landa gunetara –Menoio, Madaria, Bachicabo, Labraza, Okariz, Alangua, Arrizabala eta Barria– sartzeko errepideen zolatua, egiaztatu baita oso hondatuta dagoela, zuloak eta deformazioak egoteaz gain irekita baitago hainbat zonatan.
Gainera, beste sei bidetan ere jarduteko balioko du, hala nola A-3022, A-3126, A-3202 eta A-3616 errepideetan. Lan horiek egiteko inbertsioa 490.694 euro dira, eta diru kopuru hori erantsi behar zaio joan den uztailaren 12an onartutako 1,6 milioi euroei, zeinak bideratuta baitaude Arabako berrogeita hamarren bat errepideren zorua berritzeko; hartara, 2,1 milioi eurotara igo da astebete eskasean Arabako bideak mantendu eta onik zaintzeko zuzeneko inbertsioa.
Bi kontratuak Araban lan egiten duten enpresei esleitu zaizkie; hortaz, kontratu horiek gauzatzeak lagundu egingo du suspertzen eraikuntza eta enplegua arlo honetan.