Aiarak San Isidro azoka ospatuko du maiatzaren 15ean Arespalditzan. Egun horretarako egitarau oparoa prestatu dute. Aurten, ohiko baserriko eta artisautza produktuen azokaz gain, berrikuntza gisa, txakolin eta gazta dastatze gidatuak ere egingo dituzte.
Azoka 9:30etan zaladuko dute eta bertan nekazaritza zein artisautza produktuen erakusketa eta salmenta egingo dute. Hala ere, jaia lehenago hasiko da, izan ere, Pirinioetako behi-azienda hautatuaren Arabako lehiaketaren bigarren edizioa ospatuko dute eta txapelketari ekingo diote 8:00etan. Abereak jaso, azkerketa egin eta klasifikatu ostean, horren sari banaketa 13:30tan egingo dute. 10:30etatik aurrera ardi, ahuntz, asto eta zaldi erakusketa egongo da. Gainera, eskualdeko bertako oiloen, makilen eta untzi erraldoiak ikusteko aukera egongo da.
Haurrentzako hainbat ekintza
Haurrentzako bi tailer egingo dituzte Arespalditzako Gizarte Etxean. 11:00etan artilearekin eskulanak egiteko saioa hasiko da eta 12:30etatik aurrera eskuak orean sartuko dute taloa egiteko. Aurten, lehenengoz, txakolin eta gazta dastaketak egingo dituzte euro baten truke eguerdian. Gainera, herriko tabernetan tokiko produktuekin egindako pintxo bereziak dastatu ahal izango dira.
Ohiko meza santua 12:00etan izango da. Jaiarekin amaitzeko, 13:30etan herri kirolen erakustaldia egingo dute.