Aiarako herri batzuek inauteriak ospatuko dituzte otsailaren 6an Luiaondon eta Arespalditzan. Otsailaren 5ean Etxaurren Ikastolak ospatuko ditu eta Zuhatzatik oilarra paseatuko dute.
Luiaondoko festa 17:00etan Malatu Aretxatik irtengo den kalejirarekin hasiko da. Ondoren, Zigor Ostik “Lapurreta” haurrentzako ikuskizuna aurkeztuko du eta txokolatea eskainiko dute.
Arespalditzako Gizarte Etxe berrian 17:30etatik aurrera ospatuko dituzte Aratusteak. Arratsaldea Torrada lehiaketarekin hasiko da eta ondoren disko-festa eta mozorro-festa egongo dira. Bukatzeko, 19:30ean, sari banaketa, txokolate jana eta torraden dastaketa egongo da.
Etxaurren Ikastolak ere Aratuste jaia egingo du otsailaren 5ean. Goizean ikasleek Zuhatzako kaleetatik oilarra paseatuko dute eta arratsaldean gurasoentzako ikuskizunak eskainiko dituzte.
Inauterietako jolas txokoetan izena emateko epea gaur agortuko da
Otsailaren 8an eta 9an, Arespalditza eta Luiaondoko ludotekek Sioux herriaren inguruko tailerrak egingo dituzte. Bertan, tipiak eta totemak egingo dira eta Iparramerikako talde horretako bizimodua ezagutaraziko dute.
Txokoak 10:00etatik 13:30era egingo dira eta 2006 eta 2012 urteetan jaiotakoei zuzenduak egongo dira. Izena emateko gaur bukatuko da epea eta udaletxean edo Luiaondoko bulegoetan egin beharko dute interesdunek.