Aiarako Udalak udal ikastaroetan izena emateko aukera emango du urte osoan. Hala, udalak eskaintzen dituen edozein kurtsoan parte hartzeko interesa dutenek, eta plaza egonez gero, nahi dutenean hasi ahalko dira. Bestalde, urritik aurrera 6 eta 18 urte bitarteko haur eta gazteek zumba praktikatzeko aukera izango dute Arespalditzan eta Luiaondon.
Jadanik abian den udal ikastaro batean parte hartu nahi duenak interesatzen zaion klasera joan beharko du eta irakaslearekin hitz egin. Plaza egonez gero, fitxa bat bete eta kontu korronte batean matrikulazio dirua sartu beharko du. Ordainagiria irakasleari eman beharko zaio. Kurtsoak udaleko webgunean, Facebook-ean eta uztaila eta iraileko Saraube aldizkarietan daude ikusgai.
“Zumba kid´s”
Kultur arloak 1997 eta 2009 urteen artean jaiotakoentzat zumba klaseak prestatu ditu. Ikastaroa Arespalditzan asteazkenetan 18:00etan izango da eta urriaren 14an hasi eta 2016ko maiatzaren 25ean bukatuko da. Luiaondon, aldiz, ostiraletan 18:00etan emango dira urriaren 16tik aurrera, 2016ko ekainaren 10ean bukatuz.
Izena emateko epea urriaren 5etik 13ra izango da eta 36,60 euro balioko ditu. Inskripzio orria info@aiarakoudala.eus helbidera bidali edo udaletxean utzi daiteke.