Iaz Aiarako Eskualdeak Laudion, Amurrion eta Artziniegan zazpi ekogune jarri ondoren, aurten beste hiru jarri ditu Luiaondon eta Arespalditzan, etxeko hondakin txiki eta arriskutsuak modu errazago batean biltzeko.
Gune horietan utzi daitezkeen objektuak CDak eta DVDak, inprimagailuko kartutxoak, telefono mugikorrak, kargatzeko gailuak eta bateriak, pilak, eta tresna elektriko edo elektronikoen hondakinak dira, adibidez, erlojuak, kalkulagailuak, saguak edota bizarra mozteko makina, besteak beste. Gainera, kontsumo baxuko bonbillak ere bertan bota daitezke, harizko bonbillak aldiz, biltegi arruntetan utzi beharko dira.
Biltegi hauetan plastikozko tapoiak ere bilduko dira. Azken hauek kausa solidario batentzako izango dira eta bertan mota guztietako tapoiak bota ahal dira, olio botilarenak, detergentearenak, sprayrenak edota hortzetako pastarenak ere.
Ekoguneen kokalekua
Arespalditzan Ferial delakoan jarri dute eta Luiaondo bi jarri dituzte: bata estankoaren aurrean eta bestea Padura kalean. Ekogunea hondakin bakoitzarentzako zirrikituak duten biltegi txikiak dira eta erabiltzeko errazak dira.