Joan den martxoak 31n Aiarako Udaleko aurrekontuak onartu ziren EH Bildu, PP eta EAJren aldeko botoekin. Aiara Batuz-ek kontra egin zuen. Aurten 2.567.356 euro izango ditu Udalak eta inbertsioen artean Luiaondoko Osasun Zentro berria, farmazia bat edota Kontzejuei diru-laguntzak daude.
Inbertsioak
Aurrekontuetan agertzen diren inbertsioen artean urrian bukatuko diren Osasun Zentro berriaren obrak agertzen dira. Gainera, farmazia-botika bat egiteko alboko etxola baten berriztatzea ere kontuan hartzen da. Helburua udalerrian farmazia zerbitzua zabaltzea da.
Bestalde, Etxaurren Ikastolako komunak konponduko dira eta udal bulegoak berrituko dira. Arespalditzako eta Luiaondoko kirol pistak konponduko dira neguan gehiago aprobetxatu ahal izateko.
Aurten ere alboko beste udalerrietako kiroldegi publikoak erabiltzeko diru-laguntzak emango dira. Horrela, Aiarako herritarrei zerbitzu horien erabileraren kostua gutxituko da.
Batzar Administratiboetan proiektuak eta obrak egiteko diru-laguntzak ere agertzen dira aurrekontuan. Guztira, 207.686 euro bideratuko ditu Udalak eta laguntza horiek hobeto erregulatuko dituen ordenantza egingo da.