Maiatzaren 15ean San Isidro azoka egingo da Arespalditzan. Aurtengo edizioan ganadu erakusketa kendu eta Pirineotako Behi Arrazaren Lehiaketa egingo da lehen aldiz. Araban mota honetako lehiaketa bakarra izango da eta Aiarako azoka lurraldean erreferentziazkoa bihurtzea du helburu.
Aurtengo azokak baserritarren produktuak eta bailaran egiten direnak erakutsi eta salduko ditu. Hala, zonaldeko gazta eta txakolina egongo dira, besteak beste. Gainera, aurten ere Lehen Sektorearen Astea antolatuko dute, hitzaldiak eta jardunaldiak eginez.
Pirineotako behi arraza
Arabako Behi Pirenaikoen Elkartean 68 abeltzain daude eta horietatik 26 aiararrak dira, 1.489 aberebururen jabeak dira. Hori dela eta, behi arraza horren lehiaketa egitea erabaki du Udalak, behi horri balioa eta bultzada emanez eta abeltzainen lana aitortuz.
Bestalde, Bizkaian zein Gipuzkoan era honetako lehiaketak egiten dira, baina San Isidrokoa izango da Araban egiten den lehenengoa. Urteen poderioz, egitasmoa indartu eta zabaltzea espero da.