GENTZA ALAMILLO (Luiaondo, 1977) hurrengo udal hauteskundetan EAJren hautagaia izango da. Gaztea izan arren udalgintzan aritu da dagoeneko eta berez Luiaondoko batzar administratiboaren lehendakaria da.
Zinegotzia izan zara, dagoeneko Luiaondoko administrazio batzarraren lehendakaria zara. Zure esperientziak zertan laguntzen zaitu?
Aiara Herriko errealitate administratibo, sozial eta kultur anitzaren inguruko esperientzia; Udalaren egunerokotasunean agertzen diren arazo zein erronkei aurre egiteko beharrezkoa den esperientzia alegia, hau da, eraginkorra izateko gaitasuna.
Nire ustez, ezagutza aberasgarria da, Aiarako errealitate administratiboaren maila guztietan ibili izanak perspektiba zabalago batekin aritzeko gaitasuna ematen dit, besteak beste.
Alkategaia izendatua eta gero, zerrendan agertuko diren pertsonak dituzu?
Ilusioz eta gogoz beteriko pertsona talde zabala dugu eta bertatik aterako da udal talderik onena, ez dut inolako dudarik; beti ere, EAJ-PNVk duen hautagaitza sistema errespetatuz non egikarituko eta zehaztuko den behin betiko zerrenda osatuko duten pertsonek.
Nola ikusten duzu Aiara?
Aiara biziago baten beharraz, Batzar Administratiboekin batera elkarlanari helduz, aiararrok merezi ditugun zerbitzuen eskaintza eta kudeaketa hobetu beharra ikusten dut.
Aiarak eskaintzen dituen hobekuntzarako aukera aniztasuna eta oparoa goraipatu nahiko nuke, naturaren aldetik zein giza baliabideen aldetik; azken hauek, Aiara hobetzeko lanean jarduten diren elkarte zein taldeen lana sustatu, bultzatu eta indartzeko premia ikusten dut.
Zein izango dira zure kudeaketa proposamenaren irizpideak edo ardatzak?
Aiarako EAJ-PNVk, Aiararako duen herri proiektua gobernantzari loturikoa da, hau da, gertutasunetik udal bizitzan gardentasuna, parte hartzea eta jasankortasuna dira zutabe nagusiak.
Aiararrak euren arazoei zein kezkei erantzuna emateko baliabide izan behar gara udal ordezkariok; bestalde euren proposamenak entzun eta aditzeko parte hartze eremu errealak martxan jarri beharra ikusten dugu gobernu eraginkor baten tresna moduan alegia; beti ere, dagoeneko existitzen diren Batzar Administratiboekiko elkarlana indartzea ahantzi gabe, eurak baitira egun bizirik dirauten formula administratibo gertuena eta erreferentea aiararrontzat.
Aiararentzat estrategikoak izango diren proiektu ezberdinak, jasankorrak izatea ezin bestekoa izango da, gure ingurumen pribilegiatua errespetatuz.
Zein uste duzu izango litzatekeela zure ekarpenik garrantzitsuena alkate gisa?
Konpromisoa, gertutasuna eta esperientziak bermatzen duen eraginkortasuna. Aiaran jaio, hasi, hezi eta bizi naiz. Ohore handia da niretzat Aiara biziago bat lortzeko erronkari heltzeko ematen didaten aukera EAJ-PNVren eskutik.