Udalak Aiarako Hiri Antolamendurako Plan Orokorraren (HAPO) aurrerapenaren aurkezpena egiten ari da Aiara osatzen dituzten 23 herriekin. Planak lurraldea antolatzeko balioko du eta etorkizunean udalerriak izango duen bilakaera eta hiri zein landa eremuen okupazioa zehaztuko ditu.
Prozesua 2013. urteko abenduan hasi zen eta orain Aurrerapen fasean dago. Hau da, kontzeju bakoitzak bere lurzoruaren diagnostikoa egin ondoren, udaleko teknikariek azken horiek aztertu eta zenbait aldaketa egin zituzten.
Orain aldaketak herrietan aurkezten ari dira. Hala, bilera horien helburua diagnostikoetan egindako aldaketen berri ematea da kontzejuek arrazoibideak aurkez ditzaten.
Horretarako, bi hilabete eta erdiko epea izango dute eta bitartean arkitekto batek aholkularitza lanak egingo ditu astean behin.
Bilerak urtarrilean hasi ziren eta apirilean amaituko dira. Hala eta guztiz ere, parte hartu nahi duen orori irekiak daude eta Udalak web gunean atal bat ireki du HAPOa ezagutzeko eta horren inguruko herritarren iritzia jasotzeko.