Duela urtebete baino gehiago Felix Mugurutza, Patxi Galé eta Mikel Gorrotxategi Euskaltzaindiko Onomastika batzordeko kideek “Aiarako toponimia nagusia” liburua argitaratu zuten Arabako Foru Aldundia eta Euskaltzaindia beraren eskutik.
Orain Euskaltzaindiak bere web-atarian eskaintzen du euskarri elektronikoan doan lortzeko aukera eta hurrengo helbidean eskuratu daiteke. Aiarako Udalaren ekimen baten emaitza da testua, ikusita bideetako seinaletan akats ugari zegoela, Euskaltzaindiko Onomastika batzordeari eskatu baitzion udalerriko herri eta auzoen izenak proposatzeko.
Lan hori egiten hasitakoan, batzordeak ikusi zuen egokia izan zitekeela izenekin batera azalpen batzuk ematea eta hala sortu zen orain argia ikusi duen lana.
Kontzeju eta auzoen izenak eta historia 362 orrialdetan
Liburuak dituen 362 orrialdeetan zehar Euskaltzaindiko Onomastika batzordeko kide diren Patxi Galé, Mikel Gorrotxategi eta Felix Mugurutza egileek udalerriko kontzeju historiko eta auzo nagusien izenak errepasatzen dituzte, leku horien deskribapena ez ezik, izenen jatorriaz, historiaz eta normalizazioaz ere zenbait iruzkin eginda. Azkenik, eskualdeko mendi toponimiari buruzko kapitulu batez osatua dator argitalpena.