MARI ANGELES ISASI (Kexaa, 1957) Kexaako batzar administratiboaren lehendakaria izateaz gain jaien antolakuntzan parte hartzen du, Kexaako hainbat jende bezala. Aurtengo jaien inguruan mintzatu da eta Kexaan jaietan dituzten helburuak aipatu ditu.
Zer prestatu duzue Kexaako jaietan?
Larunbatean hasi ziren tute txapelketarekin. Gero Imanol Magoak ikuskizuna egin zuen umeentzat eta gero parrillada genuen. Euriak izorratu ziguna, hasi baitzen jendea eserita zegoelarik afaltzen hasteko. Hala ere gero disko festari ekin genion
Igandean atsedena hartu dugu eta astelehenean eta asteartean 18:00etatik 20:00ak arte bola jokoaren txapelketa dago bolatokian.
Asteartean goizeko 09:00etan suziriak jaurti egiten dira eta kanpaiak joko dituzte eta 11:30ean segizioa hasiko da parrokiatik baselizaraino eta 12:00etan egingo da meza.
Segizioan emakumeok eramaten dugu birjina. Gainontzeko segiziotan gizonezkoek eraman ohi dute baina Kexaan betidanik eraman dute emakumeek. Ez dakit zein den arrazoia, txikia delako agian.
Nahiz eta ibilbidea motza den txandakatzen gara.
Meza ondoren zozketa egingo da. Tartaren zozketa deitzen diogu nahiz eta beste gauza batzuk ere zozketatuko diren. Trikitilariak egongo dira giroa alaitzeko eta gauean, larunbatean bezala, disko festa egongo da.
Nola antolatzen dituzue jaiak?
Nahi duenak laguntzen du. Nahiz eta batzar administratiboan gauden hiru pertsonek ere parte hartzen dugu baina guztion artean egiten dugu; batzuk parrillada egiten, beste batzuek garbitzen...
Zeintzuk dira Kexaako jaien helburuak?
Jendeak ondo pasatzea. Hemen, leku guztietan bezala, ondo pasatzen du kanpotik etorritakoak. Hemengoek antolatzen dugunez eta lanean gaudenez ez dugu denbora askorik gozatzeko.
Baina elkartzea eta inguruko herrietako jendea etortzea ondo dago. Egia da antzinako erromeriak galdu direla baina barbakoa ostean musika jarriz gero jendea animatzen da dantza egiten; pertsona nagusiak zein gazteak.
Eta apurka-apurka ea berreskuratzen dugun jaien giroa.
Hori bai, gu konturatu gara beharrezkoa dela parrillada bat jendeak indarrak har ditzan.
Antzinako jaiak, aipatu dituzu, oso ezberdinak ziren?
Aspaldi jende gehiago zegoen jaietan. Eta jendea ikusle gisa dago gaur egun. Begiratzera etortzen dela dirudi. Pertsona gehienak txosnara hurbiltzen dira eta hor egoten dira edalontziarekin dantzatu ordez, nahiz eta musika egon.
Antzina jende orok dantzatzen zuen jaietan.