Aiara Herriko Agiñigan egunotan dira ospatzekoak bertoko Donejakue jaiak, hamaika ekintzaz osaturiko programa kaleratu dutelarik horretarako antolatzaileek.
Ostegunean, uztailaren 24an, esate baterako, bi txapelketa izango dira: 17:30etan briskarena eta 19:30etan igelarena hurrenez hurren. Gau partean, 21:00ak aldera parrillada eta jarraian diskodantza izango dira. Goizeko ordu txikietan, 04:00etan hain zuzen, IV. Igel arrantza leihaketa gauzatuko da.
Ostiralean berriz, eguerdi partean baino ez dira ekintzak egongo. Hala, 13:00etan meza eta, handik ordu erdira, pintxo dastaketa izango dira; gero, 14:30etan, zozketa.
Asteburuan sarturik, larunbatean hain zuzen, 09:30etan hasteko, herriko inguruneak ezagutzeko martxa gidatu batez gozatzeko parada izango dute bertaratzen direnek. Gero, ibiliak sortutako gosea isiltzeko, 15:30ak aldera, herri bazkaria izango da, aurretiaz 10 eurokoa ordaindu beharko delarik. Azkenik, jaiei bukaera emateko, hitzaldia antolatu dute Gorka Belamendia, Gasteizko Ingurugiro Gaietarako Ikastegiko kidea, izango delarik hizlari; bera miruen inguruan hizketatuko da.