San Isidro azoka maiatzaren 15ean ospatuko dute. Baina hori ez ez ezik, Aiarako Lehenengo Sektorearen III. Astea ere antolatu dute.
Bi ekimenak uztartzen dituen egitarauak maiatzaren 13an izango du hasiera. Bihar 18:30ean Aiarako Lehenengo Sektorearen III. Astea irekiko du Jesus María Garayok hitzaldiaren bitartez. Arespalditzako erabilera anitzeko aretoan egingo du.
Maiatzaren 14an goizean eta arratsaldean bola-jokoa izango da protagonista Kexaako bolatokian. Arratsaldean, 18:30ean hain zuzen ere, Gorobeli buruzko iragana, oraina eta etorkizuna eztabaidatuko dute Jesus María Garayok, Salvagoro Elkarteak, UAGA sindikatuak, Arabako Espeleologia Taldeak eta Aiarako abeltzainek.
Azoka
Maiatzaren 15ean ospatuko dute San Isidro Aiaran. Arespalditzako kaleetan. 09:30etatik aurrera Euskal Herriko Artisautza-produktuen erakusketa eta salmenta egongo da. 10:30ean, aldiz, behien -frisiarrak, piriniarrak, limousinak, txarolesak eta terreñak- ardi latxen, ahuntzen, astoen eta zaldien erakusketa ikusgai izango da.
Aztarna elkarteak ere ekarpena egingo dio azokari eta antzinako nekazari tresnak erakutsiko ditu. 12:45ean herri-kirolen txanda izango da eta 13:00etan tokiko eta eskualdeko gazta eta txakilona dastatzeko aukera emango dute. Bestalde, zenbait txakolin-upategiren aurkezpena egingo dute.
Umeentzako lekua ere egongo da, puzgarriak jarriko baitituzte.