LAUREN URIA PEÑA (Aiara, 1965) Aiarako abeltzaintza zinegotzia da. Maiatzaren 15eko San Isidro azokaren antolakuntzan murgildua dago.
Noiztik antolatzen da azoka?
Noiztik zehazki ez dakit. Hori bai, oso antzinako azoka da; 100 urte izatetik hurbil egongo da. Atxako Markesak antolatu zuen lehenbizikoz. Gaur egun Udalak antolatzen du, Foru Aldundiaren, Kutxabanken eta Zaballa Nekazal Garapenerako elkartearen laguntzarekin. Talde bat osatu dugu azokaren antolakuntzan aritzen garen guztien artean eta egitaraua eta egunaren mekanika garatzen saiatzen gara.
Nahiko mekanika konplexua da: abereak kokatu behar dira, animaliekiko segurtasunaren araudia bete behar da (geroz eta zorrotzagoa dena)...
Zein helbururekin antolatzen da azoka?
Gure helburua sektorean erreferentea izango den azoka bat sortzea da. Araba mailan bi azoka baino ez daude abeltzaintzaren sektorearen erreferenteak direnak: Aguraingoa (800 urte baino gehiago dituena) eta Aiarakoa.
Azokaz harago joaten saiatu gara, aste horretan zehar sektorearen inguruko hausnarketarako espazioak sortuz. Lege-agintaldiko lehen urtean elikadura subiranotasunaz eta antzeko kontzeptuez egon ginen hitz egiten, eta baita kontsumitzaile eta ekoizlearen arteko bidea laburtzeko bere hainbat ekimenez ere, eskualdeko sektorean indarberritzeko xedearekin.
Aiarak propioki dituen baliabide naturaletan zentratuko gara aurtengo jardunaldietan, Gorobeleko lurzoru publikoetan hain zuzen.
Aiaran lehen sektoreak pisu nabaria du oraindik, ez?
Ba bai. Beste urte batzuetan egin ditugun jardunaldiak horretara zuzenduak zeuden, auto-enplegua sustatzeko eta deserrotzea eta despopulatzea ekiditeko modu bat bezala. Nik uste dut lehen sektorea oraindik nabarmena izatea aukera bat dela aiararrarentzat
Maiatzaren 15ean izango da azoka, zer egongo da egunean zehar?
Gune bat egon ohi da erreserbatua Euskal Herri mailako artisauek euren produktuak erakutsi ditzaten. Aurten ere Iparraldeko jendea etorriko da.
Hori da gure asmoa: San Isidro azokak Euskal Herri mailako zabalpena izatea. Hortaz gain, ohiko abere erakusketa ere badago. Behiak, ahuntzak, ardiak eta zaldiak egongo dira.
Iaz tokiko oiloaren (Laudioko oilo autoktonoaren) berreskurapenaren aurkezpena egin genuen, eta aurten ere egongo da oilo mota hori ikusteko aukera. Hortaz gain, Aztarna elkartearen eskutik antzinako tresnen erakusketa bat izango dugu.
Herri kirolak ere egongo dira, eta baita Aiarako gazta ere. Eskualdeko lau txakolin upategiren presentzia ere baieztatua dago. Umeentzako espazio bat ere erreserbatuko dugu.
Nik uste dut San Isidroko azoka orainaldiarekin zita bat dela, ez iraganarekin. Garena baldin bagara lehen sektorearekin dugun loturagatik da.