Atzo Kexaan ospatu zen Aiarako Alderdi Popularraren VI. kongresuan Joseba Elajalde Artziniegako zinegotzi popularra hautatu zuten eskualdeko presidente. Elejalde hautagaiak alderdi popularreko militanteen bozen % 100 eskuratu zuen Kexaan. Santiago Abascal Escuzak martxoaren bukaeran ezagutzera eman zuen 33 urteren ostean politikagintza aktiboa utziko zuelan"nekeagatik batez ere".
Arcos de Quejana hotelean ospatutako kongresuan Euskadiko Alderdi Popularreko goi-kargu asko bildu ziren, Arantza Quiroga, Carlos Urquijo eta Alfonso Alonso besteak beste. Quiroga presidenteak Abascal familiaren lana aitortu nahi izan zuen "urte guzti hauetan kuraia adibide itzela izan zarete".
Santiago Abascalek ere esker hitzak izan zituen alderdi popularreko kideentzat, eta aurrerantzean ere alderdiko afiliatu izaten jarraituko duela jakinarazi zuen. Era berean, askatasuna ez dela negoziatzen adierazi zuen Abascal Escuzak Kexaan, "ez eta Espainiako batasuna ere". Hitz hartzean Aiara Kantzilerra gogora ekarri zuen, "bera izan zen ziurrenik lehenengo europazalea, askok ahaztu nahi omen dute hori, existitzen ez diren mugak bilatuz". Bere despedidan alderdi popularra utzi eta VOX alderdiko idazkari nagusi den Santiago Abascal Conde semea ere izan zuen ondoan Kexaako ekitaldian.
Joseba Elajalde presidente hautatu berriak hitza hartu eta "gastu soziala benetan behar duten pertsonen eskuetara iritsi dadin" instituzio desberdinen arteko akordioak sustatuko dituztela adierazi zuen. Era berean Aiaran turismoa handitzeko garrantziaz hitz egin zuen, "sektore honek eskualdeko ekonomia babestu dezan".