Aiarako Udalak urrats berri bat egin du 2014-2017 aldirako euskara-plana garatzeko Euskararen Aholku Batzordearen sorrerarekin. Beste bi kide berri sartzearekin batzordea gutxi gorabehera osatuta eta aurrera egiteko moduan geratu da. Bertan, besteak beste, talde politikoetako, elkarteetako eta ikastolako ordezkariak daude.
Josu Artetxe alkatea bera izango da talde politikoen ordezkari bertan, eta berak adierazi duenez, haien asmoa da “sektore guztietara” zabaltzea, “ahalik eta adostasun handiena izateko”, euskarak “kontsentsua” behar duelako. Gainera, adierazi du “euskaltzale” guzti-guztien ekarpena eskertuko duela batzordeak.
Zeharkako plana
Artetxeren esanetan, euskara planak “transbersala” izateko helburua du, arlo guztietan ezarri eta praktikan jartzeko. Alkateak uste du oraingo udal-gobernua agintean dagoenetik aldaketa igarri dela euskarari dagokionez, ahal den neurrian “lehentasuna” ematen ahalegindu direlako.
Hori dela eta, Espainiako Gobernuko EAEko Ordezkaritzat ohartarazpen bat bidali du kontratazioetan “diskriminazioa” egon litekeelako haien ustez, baina Artetxek adierazi du ez daudela kezkatuta eta “kasurik ere” ez diotela egiten.
Planak beraz arlo ugari jasotzen ditu: testuen argitalpena, udaleko erabilera presentziala edota jaietan euskarak duen lekua ere ba; esate baterako, San Isidro egunean salmenta-postuetan euskararen erabilera bultzatzeko egitasmoa jarri nahi dute praktikan.
San Prudentzio jaiak
2014ko San Prudentzioko jaiei dagokienez, Arespalditza prest dago jaiak hartzeko, eta laster jakinaraziko dituzten egitarauaren zehaztasun guztiak.
Aurten hiru eguneko jaiak izango dira, apirilaren 26tik 28ra, eta aurreikuspenak oso onak dituzte udaleko arduradunek, izan ere, aurreko urteotan ez bezala, ez dira ospatuko Amurrioko San Jose auzoko jaiekin batera, San Josekoak hurrengo asteburuan egingo dira eta.
Mendi lasterketa, herri bazkaria, herri kirolak, dantzak, kontzertuak... makina bat ekintza izango ditu egitarauak.