Duela egun batzuk albiste batean jasotakoa Naturayala elkarteak berak azaldu du bere blogean:
"Otsailaren erdialdean Seo/Birdlife-eko (Espainiako Ornitologia elkartea) teknikariek, Eusko Jaurlaritzaren laguntzaz, hiru miru gorri harrapatu zituzten Aginaga herrian (Aiara) eta GPS-GSM igorgailuekin markatu zituzten. Jarduera hau Migra programaren baitan dago sartuta eta neguko migrazio-mugimenduak aztertzea du helburu. Hiru miru gorrien izenak hauek dira: Aginaga, harrapatua izan zen lekuaren omenez, Ataria eta Pobes.
Horrez geroztik, beren mugimenduak Seoren web gunearen bitarteaz jarraitu daitezke: www.migraciondeaves.org. Gure blogaren bitartez miru hauek egiten dituzten migrazio-ibilbideen zein beren ugalketarako lekuen berri emango dizuegu.
Aipatutako miruak harrapatzeko Aguiñiga Gaztandegiko familiaren laguntza ezinbestekoa izan zen, artzakurren janariaren soberakinekin hegaztiak tranpetara erakartzea lortu baitzuten, hainbat egunetan saiakerak egin eta porrot egin ondoren.
Zentzu horretan, nabarmentzekoa da herri txiki honetako biztanleen artean berri honek sortu duen jakin-mina. Izan ere, uda partean aipatutako herrian hitzaldi bat egitea aurreikusi dute, ez bakarrik gure basoko faunaren inguruko ezagutzan aurrerapausoak egiteko, baita ikerketa zientifikoak landa guneetara gerturatzeko helburuarekin ere, askotan bateraezinak eta errealitatetik urrunduak baitirudite.
Gogora dezagun, miru gorria (Milvus milvus) galzorian egoeran katalogatuta dagoela maila nazionalean zein autonomikoan, 1994 eta 2004 urte bitartean %50eko gainbehera jasan ostean. Hortaz, ikerketarako, kudeaketarako eta kontserbaziorako neurriak behar ditu."