Arespalditzan sartu berri den Batzar Administratiboaren kalkuluen arabera 104.000 euro falta dira haien kontuetan.
Urtarrilean piztu da polemika. Pasa den urteko amaieran egin ziren Batzar Administratiboen hauteskundeen ondorioz ordezkari batzuk aldatu dira. Horietako batek erakundearen kontu korronte bat eguneratzean sumatu zuen 60.000 euro inguru falta zirela, kontuen arabera.
Pasa den ostiralean Arespalditzako kontzejua egin zen. Batzarkidea batek azaldu zuen paperetan jasotako mugimenduen eta kontu korrontearen errealitatearen artean 104.000 euro inguruko desfasea dagoela.
Arabako Foru Aldundiaren esku
Desagertutako diruaren nondik norakoak ikertzea Arabako Foru Aldundiaren eskumena izango da. Antza 3 Batzar Administratibo gehiago antzeko edo okerreko egoeran daude herrialdean eta administrazioarekiko auzi-prozesura jotzeko ikerketa oso zorrotza behar du Aldundiak.
Irregulartasun gehiago
Horretaz gain arau-hauste gehiago azalaratu dituzte. Aurreko alkateak 4.992 euro kobratu zituen 2013an modu irregularrean.
Diru kopuru hori dieta gisa bereganatu zuen Batzar Administratiboaren ordezkari lanak egiteagatik. Baina aurretik Foru Aldundiak baliogabetu zuen diru finko bat kobratzea soldata moduan. Aldundiak adierazi zuen Batzar Administratibo baten alkateak lana doan eta borondatez egiten duela, beraz, zeozer kobratzekotan, egindako gastuetan oinarritu behar du eta ez soldata gisa.
Kontu korrontean 3.081 euroko gastua ere justifikatu gabe dago.
Ondorioak
Diru gabeziaren ondorioz Arespalditzako Batzar Administratiboak uko egin beharko dio Gizarte Etxea egiteari. Aurten eraikinaren obrak hasi eta 238.000 euro inguruko diru-laguntza jaso behar zuen Arabako Foru Aldundi eta Eusko Jaurlaritzatik. Baina obrak hasteko dirurik ez duenez, Arespalditzak aurtengo diru-laguntzak galduko ditu.