Aimara antzerki taldeak oihala altxatuko du Lantenoko eskoletan “Yo soy la revolución” jendaurrean lehen aldiz antzeztuz bihar 20:00etan. Nahiz eta abenduaren 14an Amurrion estreinatu, larunbat honetan Lantenon alfonbra gorria zabalduko dute aurre estreinaldiarekin.
“Yo soy la revolución” zoroetxe batean kokatuta dago, non, Frantziako Iraultzaren inguruan antzezlan bat prestatzen duten. Antzezlana, Aimarak egin duen birmoldaketatik jaio da. Moldatu den lana “La persecución y asesinato de Jean Paul Marat” izan da. Drama eta umorea bateratzen ditu antzezlanak, historiaren bidetik, XVIII. mendera garraiatuz. Hiru genero hauen konbinazioa ikusteko aukera izango du larunbatean 20.00tan Lantenora hurbiltzen denak.
Amurrioko antzerki taldea
Aimara antzerki taldeak hogei urte eman ditu Amurrion antzerkiarekiko grina pizten. Hasieran, emakumeen taldea zen baina 1996an gizonak antzerki taldera sartzen hasi ziren.
Argi uzten dute, Aimara antzerki taldean parte hartzeko ez dela antzerkian profesionala izan behar, baina etxean lan mordoa egin behar dela aitortzen dute. Hala, antzerki amateurraren aldeko apustua egiten dute baina bide hori jarraitzea ez dela erraza diote, beraz, ezagutzera emateko, urtero antzerki mota horren inguruko erakustaldia egiten dute. Zentzu horretan, beste herrialdetan antzezteko aukera izan dute eta beste tokietako antzerki talde amateurrekin harremana ere.
Aimara taldeko kide den Ixonek dioen bezala: “Amateurra ez da zergatik txarra izan behar”. Sakrifizioa eta konpromisoarekin, lana ondo egiten da eta Amurrioko antzerki taldean horrela egiten dute, bere ustez. Hala, antzeztuko diren antzezlanak aukeratzeko, proposatzen direnak, kide bakoitzak irakurri eta guztien artean erabakitzen dute. Beraz, lan indartsua egiten dute etxean antzezleak eta taldean, Kultur etxean aritzen direnean. Antzerkian jardun nahi duenari ateak zabaltzen dizkiote Amurrioko kultur etxetik asteazkenetan 18.30ean pasatzeko.