Aiara Batuz plataformak Etxaurren Ikastola osatzen dutenen “jarrera eta lana” publikoki aitortu nahi izan du, “garbiketa langileen alde azaldu duten ulermen eta elkartasunagatik”. Gurbisa enpresa da Aiarako eraikin publikoetako garbiketa egiteaz arduratzen dena. Enpresa horrek, baina, hilabeteak daramatza bere langileei ordaindu gabe. Horregatik, udalak, EAJren mozio bat onartuaz, azpikontratari ordaintzeari utzi zion, honek langileei ordaintzeari berriz ekin arte. Orduz geroztik, garbiketa zerbitzua etenda dago udalaren eraikin publikoetan, Etxaurren Ikastola barne.
Horregatik, ikastolako garbiketa faltaren arazo konpontzeko lanean aritu diren guztien ahalegina eskertu nahi izan du plataformak, langileei elkartasuna adieraztearekin batera.
EAJk, bere aldetik, ikastolaren egoera salatu du, garbiketa faltagatik gela zikinak, urperatutako komunak etbr. daudelako. Horregatik, udalari neurriak hartzeko eskatu dio, eta Aiara Batuz-i “egoera salatu ez izana eta arazoa konpontzeko ezer egin ez izana” egotzi dio. Plataformak erantzun du esanez udaletik “alderdi guztiek adostutako pausuak” ematen ari direla, eta beraiek ez dutela udal arazoak “salaketa eta alarma sozialaren bidez” konpontzeko ohiturarik.