Frackingaren aurka Bilduk aurkeztutako mozioa onartu egin da Aiarako Udalaren Osoko Bilkuran. Mozio hori haustura hidraulikoaren bidezko edozein teknika erabiltzearen aurka azaltzen da, “esplorazioari eta ustiatzeari dagokionean”.
Hala, mozio horren bitartez, Udalak Eusko Jaurlaritzari hidrokarburoen esploraziorako SAIA baimena bertan behera uztea exijitu nahi dio. Mozioan aipatzen denez, baimen horren bitartez SHESA enpresak sei urteko epea izango luke esplorazio lanetan aritzeko, zeintzuetan, seguruenik, Fracking teknika erabiliko litzatekeen, mozioaren arabera betiere. Ustiaketa horien eragina Aiarari “zuzenean eragin” ahal diola gaineratu du Bilduk.
Bilduren eta Aiara Batuz-en bozekin atera da aurrera mozioa. Azken honek beste puntu bat gehitu dio testuari, zeinetan Gran Enara izeneko proiektua ere arbuiatzen den. Gran Enara proiektua Araba mailan gasa ustiatzea xede duen beste proiektu bat da, Fracking Ez Araba plataformak salatutakoa.
EAJren mozio alternatiboa
EAJk, bere aldetik, mozio alternatibo bat aurkeztu du zeinean azaltzen duen esploraziorako baimena emateak ez duela Frackinga erabiliko dela adierazi nahi. Hala, SAIA baimenaren alde azaldu da.
Esplorazio baimena, baina, “lehen pausoa” baino ez dela salatu du Josu Artetxe Aiarako alkateak.