ANA UGARTEk (1950, Menagarai) urte asko eman ondoren Menagaraiko Emakume Taldean oraindik lan ugari egiteko beharra ikusten du. Nahiz eta herri txiki batean bizi, parekidetasunaren alde ekintza pila egin ditu eta epe motzean taldeak izango dituen erronkei buruz hitz egin du.
Azaroak 25 Emakumeen kontrako Indarkeriaren Aurkako Nazioarteko Egunaren harira solasaldia antolatu zenuten bezperan Menagarain seme-alaben hezkuntzaren inguruan eztabaidatzeko, zein izan da ekimen honen helburua?
Solasaldi honen eta datozen lau hitzaldien ideia emakumeen aurkako indarkeriari aurre egiteko hezkuntza dela tresnarik garrantzitsuena azpimarratzea da. Belaunaldi berriek gure heziketan izan ditugun estereotipoak ekiditu behar dituzte, edo behintzat zati bat.
Hitzaldiak emakume eta gizone gazteei, gurasoei, daude zuzenduta. Biek dute ardura seme-alaben heziketan. Nahiz eta ohitura dela-eta amak sentikortasun eta hazkuntzan denbora gehiago erabili, aita ezin da arrotza izan esparru honetan. Biak elkartu behar dira emaitza onak lortzeko.
Biek arduraz gozatu behar dute, horrek eragingo du emakume eta gizonezkoen arteko ezberdintasunarekin bukatzea. Guztion artean landu behar da etorkizuna.
Menagarai herri txikia izanda, zer suposatzen du herritarrentzat emakume talde bat izateak?
Gure inguruan dauden pertsonen iritziz, iraultza izan da eta bizitzaren egunerokotasunean nabaritu da.
Nola jaio zen taldea?
Menagaraiko Emakume Taldea modu espontaneoan jaio zen 1985eko jaietan bolo txapelketan zehar naturaltasun osoz ezberdintasun ekintza gertatu ostean.
Garai horretan zein zen emakumearen egoera herrian?
Emakumearen egoera garai horretan etxeko andrea, ama, pertsona nagusien alaba eta baserriaren uztiapenean ardurak izatean zetzan. Betebehar ugari eta soldatarik ez, ondo eginiko lanaren aitorpena bakarrik.
Asialdiaren aldetik, emakumeek zituzten aukerak ziren igandeko meza, seme-alaben irakasleekin egiten ziren bilerak edo erosketak egitea.
Nola baloratzen duzue orain arte egindako lana?
Ibilbide bizia izan da. Tabu ugariri aurre egin zaie eta hasieran ezinezkoak ziruditen ekintzak eta ideiak gauzatu dira. Kostata, baina erakundeen laguntza eta babesa izan dugu. Taldeak jakinminarekin, eta baikortasunarekin ekin dio lanari eta emaitzak begibistan daude.
Zeintzuk dira etorkizunean agertuko zaizkizuen erronkak?
Etorkizunean lanean jarraitu nahi dugu, baina indar gutxiagorekin, urteak nabaritzen dira eta. Gure itxaropena da gazteek, bere kabuz, bere alaben bizitzak hobetzen jarraituko dutela, haien semeen etorkizuna horren menpe egongo da eta. Amets moduan gure nahia bikoteek elkarrekin egitea lan hori da. Lortu diren eskubideak kostata eskuratu dira, baina gutxi behar da guztia galtzeko. Gai honetan aurrera pausuak ematearen ardura guztiona da.
Abenduaren 11an Aiara Koadrillako Emakumeen X. Topaketa egingo da. Zeintzuk dira helburuak?
Topaketek hainbat herri eta udaleko emakumeak biltzeko balio dute. Aurten izenburua erakargarria da gutxienez eta beti ikasten dugu zeozer lantaldeetan bereziki.