ENRIQUE ARBERAS (Amurrio) ezaguna da, batik-bat, biologoa delako. Baina Aginagako alkatea da ere. Egun hauetan herri txiki honek, ondare kultural ikarragarria duena, bere jaiak ospatzen ditu eta Enriquek ospakizun xume hauen garrantzia azaldu digu.
Lehenik eta behin, ezezagun bati Aginaga aurkeztu beharko bazenioke, nola egingo zenuke?
Aginaga Gorobel azpian dago, Ungino eta Tologorri artean hain zuzen ere. 29 pertsonek osatzen dugu herria, baserrietan bizi da jende gehiena eta gehienek abereekin lan egiten dute oraindik.
Zer nolako garrantzia dute Aginagako jaiek?
Sei urte daramatzagu jaiak egiten, jende gehienak parte hartzen du eta nahiko pozik gaude emaitzekin. Lehen Santiago eguna ospatzen zen ere baina gauza gutxi egiten ziren.
Orain talde gazte bat osatu dugu eta guztion artean prestatzen dugu jaia. Lehen egunean, jai-eguna ez denez, meza eta herri bazkaria pintxo batzuekin egin dugu. Baina ostiralean parrillada bat egingo dugu eta berbena egongo da.
Lehenik eta behin, helburu eta asmo nagusia ondo pasatzea eta biztanle guztiak elkartzea da. Nahiz eta baserri edo herri txikian bizi, bakoitzak bere eginkizunak ditu eta hau aukera polita da elkartzeko.
Aurten gauza berezi bat egin duzue, ezta?
Urtero aldatzen dugu zerbait eta aurten emanaldi bat egingo dugu Aginagari buruz, paisaia eta jendearen inguruan. Pasa den urtean, adibidez, Pirulo Txou aritu zen hemen.